Wia dr AlpenHirt mit sina Produkt d Frau verfüahrt und dr Maa bekheert hett

Dr Maa
Aigentli hett alles ganz aifach aahgfanga - i muass aber a bitzli uushoola.
Mini Frau hett öppis meeh as vumna Johr entschidda sich vegan z ernähra...
Janu han i tenggt - denn halt - ii sicher nitta! Und dem bin i au treu bliiba. Aber mina liab Schatz hett mi zum Nohtengga aahgreggt, und i han denn mina Flaischkonsum drasstisch reduziart. So hend miar üsari Ziit gnossa, ii mit wenig, sii mit gar khainem Flaisch und au khai tiarischa Produkt – also vegan…. bis miar denn dä Härbscht am Khurer Wuchamarkt Produkt vum Alpahirt enteggt hend…..
I han zerscht gfunda, schu huara tüür das Flaisch und zu minra Frau gsait:

„Wenn Du jo sowiisoo khais issisch, denn tuats au billigers…“

Will d Verkäuferi aber vu dem ganza Konzept verzellt und gschwärmt hett und i allerlai Salsiz probiara han könna, simmer denn doch käufig worda -  für mii a Tschillisalsiz und für mini Liabscht as Bergflaisch. So simmer denn wider ins Unterland gfaahra, und joo, das Flaisch hett denn nit bis zum Ablaufdatum ghebt; wills huara guat gsii isch - isches au schnäll furt gsii.

D Frau
So gära i mit minem Maa z Khur umaflaniera – iikaufa isch nit das, was üserer Bezüchig jewiils Höhaflüg beraitet und so hend dia Iikaufsbummel schu hi und do heftigi Disskusiona uusglöst. Denn für mina Maa gilt: As git gxunds Ässa oder guats. Und so hett är denn am Aafang wenig Verschtändnis ghaa, dass eba gxundi und qualitativ guati Nahrigsmittel a andera Priis hend als Massaprodukt.
Ufam Wuchamarkt han i denn öppanamol müassa ghöra: «Wär isst denn all das Gmüas, wo du do iikauft hesch?»
Will i zletschta Johr us gxundhaitlicha Gründ entschidda han khai Flaisch, Milchprodukt und Aier meeh  z ässa, hett das aafänglich a wunderbara Näbaeffekt ghaa  – nämli a paar Pfund z verlüüra – isch denn aber zumna Problem worda.

Mina Körper hett nu no abbaut, und i han müassa iigseh, dass as Menscha git, wo sich vegan ernähra könnt und dabii gsund bliibend und anderi, wia i, wo öppadia Flaisch bruuchend.
Aber Flaisch khaufa mit all denna Zuasätz wia Pökelsalz, Zucker etc - nai tangga!

Dr Maa
Und so ischas denn khoo, dass miar schu bald wider z Khur gsii sind, logischerwiis au uff am Markt  – go Gmüas kaufa und natürli bim Stand vum AlpaHirt verbii zum üüs mit Flaisch iitegga.
Dass miar dr AlpaHirt schu sehr bald persönlich träffend, hend miar dua no nit tenggt.

D Frau
«Du Rico, d Verkäuferi hett üs für das Bergflaisch und da Farurer Baron viil zwenig verrächnet. Das goht gar nitta!» Drufaba nimmt mina Maa z Telefon und lüütat am AlpaHirt aah, zum Abklära wia miars mit am Reschtbetrag handhaba söllend:

«I han as Problem, aber sii müand miar versprächa, dass iar euri netti Verkäuferi nit zemmaschiissand!»

I muass schmunzla: Das isch mina Maa!

D Frau und dr Maa
Miar sind erfreut, wia professionel dr Adrian Hirt reagiart und sait, miar söllends als Gschenk betrachta. Dia grosszügig Geschta hett üs jetz uff dia Person hinterem Unternehma neugierig gmacht, und so hemmer uff sinara Websiita gstöberet und dött vum Aalass: «Horenschlitten, Säumerochsen und Gipfelstürmer - eine kulinarische Reise durch Graubünden» erfahra.

Wenn das khai Grund isch uf Khur z gooh!

So stönd miar denn am Donnschtigobed kurz vor am sibni in dr Fotostiftig und stuunend nit schlächt, dass miar dia Ainziga sind. Ohje! Uusgrächnet, wenn miar vum Unterland uffa khömmend, findets nit statt.
Aber – falsch tenggt, dia Drai nehmend üs trotzdem mit uf ihri Rais: dr Daniel Schwarz vu Weinwunder mit gheimnisumwobna Saga vu Säumergschichta, Gold und Wii; dr Pascal Werner vur Fotostiftung Graubünden mit uussagekräftiga und bewegenda Bilder; dr Adrian Hirt vu AlpenHirt mit sinara Gschicht: vum Urneni und ihm, vu Visiona und Umsetzig, vu Muat und Bodaschtändigkhait.
Jeda vu inna verzellt üs mit viil Herzbluat vum aigana Unternehma und irna Passiona.
Üsera Iidruck: Sii erraichend d‘Menscha mit ihrara natürlicha und offna Art, mit iram Fachwüssa und irar Begaischterig.

D Uusfüahriga vum Adrian verdüütlichand, dass as in üsera moderna Wält khai Widderschpruch bedüütet, Läbensmittel gxund und bewährt här z stella wia zu Urnenis Ziita und d Würda vu Mensch und Tiar wider in da Vordergrund z stella. Im Gegatail: As isch vu unschätzbarem Wärt.
Vu alta und neua Wärt und vu Qualitätsbewusstsii ghörand miar denn au vum Dani. So machts üs mächtig Iidruck: D Menscha ums 18. Johrhundert umma hend us hygienischa Gründ  meh Wii ass Wasser trunka. Hüt hingäga isch dr Wii Inbegriff für Qualität und Gnuss.
Visuell umrahmt, füahrand üs dr Wildheuer-Film und d Fotogalerie, wo dr Pascal zemmagschtellt hett, inas alts Khulturguat vu Graubünda, wos gilt z erhalta für dia nögschta Generationa.
Spöter, bi fainem, uuserwältem Bündner Wii  und schmackhafta Salsiz- und Bindaflaischhäppli khunnt a uuh gmüatlichi Stimmig uuf.
Miar sind üs öppanamol nit sicher, öb das alles guat khunnt uf därra Wält – dr Optimismus und z Engagement in därra Rundi hend bi üüs aber uf jeda Fall Zuaversicht und Fröhlichkhait uusglöst.

A beriicherndi und sinnschtiftendi Begägnig, wo nachhaltig würkt.

Brigitte & Rico

 

Möchtisch au du dini beschta Fründa odr Kunda verfüahra, so findsch zum Bischpil bida Gschenkli vil ideana, wodr das bestimmt glinga wird!

AlpenHirt ist und bleibt einzigartig!

Der Brand vom 28. April hat vieles zerstört. Das Fleischlager und die Logistik sind noch intakt.
Am meisten hilfst du uns mit einer Bestellung!
Lieben Dank.
AlpenHirt-Gründer Adrian Hirt